Við komumst að því fyrir rælni, ég og einn vinnufélagi minn að við höfum bæði dálæti á ljóðum. Síðan þá höfum við verið að skemmta okkur yfir nokkrum slíkum og kynnti hann mig fyrir prýðisskáldinu Erni Arnarssyni (Magnúsi Stefánssyni). Ótrúlega skemmtilegur, með látlausan og tilgerðarlausan stíl - maður að mínu skapi. Ég læt tvö af þeim sem kættu mig fylgja hér:

SKÖPUN MANNSINS
Alfaðir í Eden fann
apa, sem um greinar rann,
ætlaði að gera úr honum mann
sem elskaði guð og náungann.

Sat hann við með sveittar brár
sextán hundruð þúsund ár.
Apinn reyndist þrjózkur,þrár,
þykkjukaldur og hyggjuflár.

Að hálfu leyti api enn,
eðlin geymir tvenn og þrenn,
lítil von hann lagist senn.
Lengi er guð að skapa menn.



BÓKIN
Við vorum um daginn og veginn
og veðrið og lífið að spjalla.
Mér fannst þú þykk og fáséð bók
og fýsti að lesa þig alla.

Svo fáséð og fallega bundin,
og fremst var snoturt kvæði.
Ég fékk þig að láni, fór með þig heim
og fletti þér í næði.

En að fletta þér allri
var okkur báðum skaði,
því í þér fann ég ekkert nýtt.
Allt var á fremsta blaði.

...hvað er með þennan %$&#$%&# kulda!? Hann var slíkur á Hótel Geysi í gær að það var rétt um kvöldmat sem að mannskapnum fór að hitna, og það var einvörðungu fyrir sakir blessaðrar brjóstbirtunnar. Þar var glatt á hjalla fram eftir kvöldi, en kuldinn tók síðan aftur völdin og sendi mann beinustu leið í ból- í stað bæjarrölts- þegar komið var inn fyrir bæjarmörkin. Það er af sem áður var. Eða bara kaldara en nokkurn tíma.

Deginum framað þessu hefur verið varið undir flísteppi í Blásölunum í hjemmehygge og í kvöld ætlum við pabbi að hætta okkur út í frostið til að berja 007 augum. Feðgin, 007, popp og kók. Góð blanda.

Á þessum kalda, vindasama degi mæli ég með því að plögga heyrnartól við lagið Sexy Back með Justin Timberlake - og gleyma sér. It does wonders.

Morgundeginum verður eytt í félagsskap übernörda á Þróunardegi á Hótel Geysi. Fyrirlestrar, minigolf, pílukast, matur og skálar. Hljómar ekki illa ónei.

Lifandi. Það er mikið og margt að gerast hjá mér, og sjálfkrafa fer því minna fyrir litlu umdeilanlega merkilegu og hversdagslegu atvikunum sem henda mig í lífinu og eru efniviður flestra færslna þessarar tjásíðu - ergo - ekkert bloggað.

Enda er af og frá að ég fari að blogga um eitthvað sem skiptir máli.

Í dag á hinsvegar minn kæri vinur Gunnar Ben þrítugsafmæli - og það er nokk merkilegt! Til hamingju Gben!